ليت الهوى دايم شرقي .. يجيب لي ريحة الشرقية !

ليت الهوى دايم شرقي .. يجيب لي ريحة الشرقية !



-
وعدنا للجو الدراسي من جديد ولا يعطيني مزيداً من النشاط إلا الإجازه التي وعدونا بها بعد شهر ونصف من الآن
رُغم بعدها قليلاً إلا أني سأخرج طاقتي الكاملة في هذه الفترة وأستعد للأيام المُقبلة : )
بالأمس عملت New look وغيرت أشياء كثيرة من نفسي إستعداداً لـ الأيام العصيبة < ما أتوقع مع اللوك
ولأجل أن أستيقظ في الصباح وأنا مُختلفة وأكثر نشاطاً من ذي قبل !
إستلمت شهادتي الجميلة اليوم كانت Different كـ صاحبتها
ولأول مرهـ أصل لـ مرحلة الدحديرة مثل مايقولون يا الله ماخفي أعظم بمشيها لـ نفسي
هـ المرة بس المرة الثانية بإذن الله بحاول أغير من مستواي تماماً يا ربْ ساعدني
-
هذه مُجرد مقدمة صغيرة لـ موضوعِنا اليوم .. واللي أشغلون ناس كثير فيه
ألا وهو ” رحـلـتـنـا لـ الـشـرقـيـة ” بأيام عيد الفطر : (
ومثل ماوعدتكُم في هذا البوست ” وعُدنا من جديد ” حان الوقت لأحقق وعدي :
أعرف أن الوقت مُتأخر جداً لكن أشياء كثيرة حدثت خارج عن إرادتي منها ;
” أحوال الدراسة – تعبي – ثُم تعب أختي ” والأحباء كانوا معي لحظة بلحظة ( F )
وبحكم أن الصور ليست معي بل عند ” عمتي mooka “
فبعد ما أخذته قبل شهر خرف السي دي وأخذته ثانية ضاع وهذي الثالثة عاد مو حلآ
نبدأ بتقريرنا عن شاليهات الهوليدي إن في الخبر من يوم الإثنين إلى يوم الخميس ولا تسعفني ذاكرتي
بالتاريخ بالضبط حدثت في هذه الأيام أشياء أقول بأنها ليست جميلة وسعيدة فحسب بل فوق هذه الكلمات
-
طبعاً أول من طرح الفكرة الثلاثي المرح ” موكا عمتو – نوني خيتو – سيس ” <= أنا
ابي العزيز حس إن الفكرة غبية مادخلت مخة أبداً أبداً ونحن مابين صياح وضجة لأنو ملعوب علينا وحنا بالرياض
وبهالحر المهم إنتظرنا .. وطال إنتظارنا ولا احد رد علينا لا عمي اللي ساحب الفكرة من باله ولا أبوي اللي دائماً
مشغول .. دقينا على الهوليدي والدنيا زحمة مااافيه إلا سادس أيام عيد الفطر إلى اليوم التاسع والكل انسحب من
هـ السفره ماعادا الثلاثي المرح طبعاً و عمي وأبوي <= مابقى أحد
بس انو باقي عماتي وعماني أعطونا إشارة انسوا الموضوع
المهم توكلنا على الله وبدأنا نجهز ” موكا راحت لجيان وشرت على قولتها كل ماخف وثقل وزنه ”
وأبوي إنسان متحمس جداً قال بنمشي الفجر مير مانمشي إلا الساعة وحده ونص
نبدأ برحلتنا من بداية الطريق
-

-
كان الطريق زحمة وعليه طلعات غبية العالم تجدع سيارتها عليك يعني الحمدلله طلعنا منها سالمين

ههههههههههه ! ابي اعرف بس وش يحس فيه وهذولي الأشياء معاه
-
-
يا حلو هـ المفرق شاطئ نصف القمر
-
-
وهنا بوابة شاليهات ” الهوليدي إن “
.. يا وحشة غيابك اللي تشبه الفرقآ
وياكبر ذنب الزمن لو يحسبني نسيتك : (
-
-
دخلنا وقت المغرب بس مع الحوسة وتنظيم الإجرائات النهائية
والتأخر في تنظيف الشاليه مادخلنا له إلا حوالي العشاء
-

-
وهُنا الرسيبشن مع الفندق
-
-
وهذا الفندق مع الشعب السعودي الخاش غلط
-
-
حتى تصدقون انو رحلتنا كانت بعيد الفطر بس معليش هذه الأخت عجازة
-
-
بداية دخولنا ” أخذنا من الشاليهات الكبيرة لأنو متأخرين بالحجز فما يمدينا نتشرط “
-
-
-
هذي الصالة قبل أن يعثى بها فسادا
وفيها ثلاث غرف نوم ثنتين كبار وحده صغنونة مع حمامين ” وانتو بكرامة “
-
-
وغرفتنا الجميلة نحن والصبايا الأربع <= زادت وحده بنت عمي
-
-
وهذي الغرفة الثانية
-
-
وهذي آخر غرفة وهي الصغيرونة
-
-
برا الشاليه ع البحر الصورة مو واضحة تقريباً كان وقت العشاء
-

-
وهذي أول جلسة لنا مكسرات وحركات
-
-
ورحنا نستكشف المكان ونمتر الشاليهات تمتير وهذا المكان عند الأوتيل والمطعم اللي يطلون ع المسابح
-
” الــــــــــــــــــــــــــــيـــــــــــــــــوم الـــــــــــــــــــــــثــــــــــــــــــــانــــــــــــــي “
-
أأكذب عليكم إن قلت العيون الأربع اضافة إلى ولد عمي ومحمد اخوي نامت الليل .. خخخخ والله يا علينا أشكال المنظر يسحر ماقدرنا نخدع أنفسنا بالنوم بس فيه أحد تسلل خفية وهجت تنام ألا وهي ” موكا ” أنا صبرت
صبرت وقبل أذان الفجر بساعة نمت .. وقمت على صوت موكا تصحيني لصلاة وتسحبني
” لا يفوووتك المنظر “ طبعاً طاااااار النوم ورحت عل تووول على منظر الشروق كان خرافي على فكرة
نورة وبنت عمي مافكروا ينامون بما إنه أول فجر وصباح لنا هنا فما جاهم النوم بعدها استيقظ نص
الشعب وشبينا الضوء كانت قعدة ماتنسى مع جو الصباح الباااااااااارد مع رائحة البحر
-

-
وأهم شي قهوة الصباح امممم لها طعم مختلف .. ع فكرة خيتو نوني وبنت عمو كانو متعرفين على بنوتات
فلة ” شروق وَ ريم ” ومن الرياض بعد طقينا معهم علاقة .. وناديناهم يتقهوون معنا
-
-
صور مع شروق الشمس ومنظر البحر العذاااب : (
-
-
-
هههههههههه جاء الشخص المليح ومعاه قوارب واااااو طبعاً الشعب فهى وناسة يمدينا نركب ونمرمط البحر بعد
-
-
-
الله أشياء حلووهـ .. لما صحينا انا وموكا تفاجئنا بالبيت الكبير اللي قدامنا مره واو واللي مسويه شخص
فاضي .. خخخخ اكتشفنا انو محمد اخوي ماجاه النوم فقعد يخربط ونورة خيتو وبنت عمو غيداء المساعدات
عالم فاضية مـــو ..؟!
-
-
بعدها رحنا وركبنا القوارب لعبنا لما ملينا خخخخخخ نتذكر الطفولة وفيها ناس فاضية تلاحقنا
اخس بنات الرياض يلعبووون احلى يا بنات الرياض ليه تيب بنات الرياض ملائكة
-
-
أعجبتنا صورة أخت شروق وريم وصورناها
-
-
هُنا جو مختلف
-
-
هههههههههه والله عليهم أشكال بس القارب هذا ممتع بمعنى الكلمة
-
-
هههههههههههههههه موكا كانت قاعدة تصور وفجإه تحس بموية حست انها سوت شي غلط خخخخ قامت بسرعة والعالم تضحك عليها وفيه ملاقيف يراقبون ويعلقون : ههههاااي عادي عادي ماي !
-

-
-
وفجإه أمطرت السماء ” ثلج ” <= قوية
هههههههههه شوفوا الصورة تيب القواقع مع الثلج <= ماتكذب أبد
لا هذا جاكيت شروق مع القواقع شرآيكم عاد
-
-
صورة من جوا الشاليه لـ المنظر برا وهذي سوسي خيتو البعيدة ” معبرة جداً “
-
-
-
راحوا البزران يسبحون ورحنا انا وعمتي موكا عند الطاولات
قعدنا وأخذنا لنا كم صورة تقريباً هذا ع الساعة 9 صباحاً
-
-
-
-
بنفس الوقت عطتنا ماما آلـو تنادينا للفطور طبعاً كنا جياعا عقب قهوة الصباح
ههههههههه غيداء ونوني ما أفطروا معنا دقوها نومه بحكم إن الفجر ماناموا مثلنا
وطبعاً هنا الصورة خخخ مافيها شي اقول لـ موكا اصبري لما يحطون كل الفطور بعدين
نصور قالت لاااا ما أتحمل جوعانه خليني اصور الحين عشان اكل ع رواق طبعاً أيدتها بالفكرة
<= ذاك الشبل من هذا الأسد
-
-
وهنا بدت موكا تتفنن بعد ما أفطرت وروقت صورة الشباك المطل على البحر
-
-
وبرضوا تتفنن حبيبتنا صورة الحلاو ” أحبه ” بإطلالة على البحر
-
-
وقت الظهر ع العصر كان الجو حااار فإستغليت الوقت خمدت شوي وفجإه أحط طب فوقي وصراخ وش السالفة موكا : يا دبشة قوووووومي انا وجهي إستفهام ليه طيب يكفي نووم فييه ناس نتهاوش معهم تعالي معنا لا تشرهون علينا بس حلو الأكشن طبعاً موكا شسمه لا تحسبونها بزر طاقة العشرين ياحبني لها بس إنسانة تستمتع معها غصب < شكلي بنسى السالفة وبعرفكم على عمتي
المهم طررررنا نتهاوش معهم والله شكلي مضحك بس على طول طقيت النظارة ورحت خييير مبزرة اكبر وحده
عمرها 10 سنين قعدنا شوي كلامهم بذيء طبعاً يتلفضون على أطفالنا وأنا ماأرضى خخخخخ
فجإه جو خواتهم الكبار وكل المبزرة ترقص من الفرحة جووو خواتنا بيطقونكم هههههههههههههههه
لكن الحق ينقال كانوا راعين مشاكل حتى كل الشاليهات اللي حولنا متأذيين منهم
وياعمري خداماتهم يجون لمنا يقولون : هدا سيطان = هذا شيطان
قلنا وانتِ صادقة : عفاريت ع هـ النجاسة
المهم قلت موكا يا الله نتمشى رحنا شفنا الطيران الشراعي وصورناها كان الوقت آخر العصر
-
-
قربنا لم البحر وأخذنا صورة للجت سكي والقوارب مع الغروب
-
-
موكا : سيس وش رآيك نركب الجت سكي : أنا : جتني الصيحة تخيلي أركب
يووومه مخيف ما أقدر ومع صور الغروب اللي لقطناها نسينا السالفة
--
-
وهنا بدت العالم تقوم مع الغروب : ) ” من أفضل الصور بالنسبة لي “
-
-
نادانا عمي بسررررعة صلوا علشان نطلع وانا ماسكة معي : وين انا ماراح اطلع من هنا
أنا والصبايا سوينا إضراب بنسنتر بالشاليهات الجو معجبنا طبعاً عمي وصلت معه يلا بس
لا أسحبكم مع أذانكم معليييييش يا عم ولا كلمة مسموعة لنا تحطمنا نفسياً وركبنا وحنا حزينيين
المهم قعدنا بالسيارة حوالي ساعة ولا وصلنا وانا وش البيااااخة قلت لكم ماله داعي هـ الحركات
بعدها وصلنا لـ كورنيش الخبر وجمب الكورنيش دخلنا مكان مررهـ حلو حنا ناظر وش ولا ندري وش السالفة
المهم عمي وأبوي يا الله انزلوا نزلنا لـ ” سايتك الخبر ” التابع لـ جامعة الملك فهد للبترول والمعادن “
-

-
وهذي صورة القبة العلمية اللي بنشوف فيها الفيلم تتلون بأكثر من لون وبرا كان فيه كوشكات
بوب كورن وعصيرات شرينا لنا شويات ودخلنا
-
-
وهذا محل الهدايا عنده أشياءات حلوة أخذنا لـ حبايبنا بالرياض وطلعنا متوجهين للقبة
-
-
وبحكم إن التصوير كان ممنوع جوا القبة فهذي صورة الفيلم اللي شفناه ” أسماك القرش “
الصراحة كان مخييييييف جداً أول مادخلنا كان شكل الدرج غريب وألوان هااااادية وظلام يا الله تشوف
مع صوت الموسيقى الصاخبة قعدنا في أماكنا وكانت القبة محيطة بكل مكان وعلى شكل دائرة
حتى تحس إنك جوا معهم في الفيلم كان ورانا بزر أزعج أمنا إزعاج بااابا وشو هدا واو بابا انا احب سمك القرش انا خلاص بغيت أهديه أذني هدية بمناسبة الإزعاج الجميل يعني وقته حتى !
كانت جمبي موكا ومن الجهة الثانية نوني وغيداء بداية الفيلم كان يخوف صدق فتحوا طيارة وكنا نطيح منها
بالبحر وحنا صرااااااخ لأنو تحس إنك معهم من قلب ما اتخيل اني قاعدة بكرسي هههههههههه
المهم صرخنا صراااخ ودمعت عيوننا بعد من الخوف خخخخخخ تميم خيو وشهود أزعجونا بصياحهم على
طول طلعهم أبوي مع الخدامة ومافيه شي ماشراه لعل وعسى يسكتون ومن صوت الفيلم العاااالي
مادريت بشي إلا لما شفت الخدامة تطلع مع اخواني .. وفيه بزران كثييير بعد طلعوا ههههههههه
وانا أشكالنا زي المبزرة غصب عني دمعت عيني إلتفت ولا موكا زيي خخخخ كان بدايته جداً مخيفة
عشان يلفتون الإنتباه ويشدونك أكثر و لكن بعد ماتعمقنا في الفيلم وتعمقنا في أعماق البحار والمحيط
وأسماك القرش صار عااااادي كملناه وطلعنا وانا نضحك على اشكالنا
-
-
طلعنا من سايتك وطول الطريق ساعة تقريباً وخلاااص جياعا تعشينا ودقوا علينا شروق وريم يخبرونا
إنهم بيسهرون معنا اليوم وعلى الساعة وحده ونص جوا وموكا استسلمت لـ النوم وجبنا
شيبسات وشكلتات وسهرنا سوالف وضحك وإستهبال وكان قدامنا أمير أشغلنا الله يصلحه هههههههه
بس أحلى شي طهبلتهم بالليل إلى الفجر يعني تلفزيون بث مبااااااشر
-
” الــــــــــــــــــــــيــــــــــــــــــــوم الـــــــــــــــــــــــــثـــــــــــــــــــــــــــــالــــــــــــــث “
-
طبعاً قعدنا إلى الصباح ولا قدرت أنام من الجو الروووعة وقامت موكا بس بعد ماراحوا البنات
وصورنا شروق الشمس والعااالم اللي بالشاليهات بدت تخمد
-
-
ورحنا انا والصبايا نصور بالكافتيريا شوي
-

-
-
تميم خيوو توه يكتشف موقع رجوله ههههههههههههه مشغلنا من اليوم عجزنا نشوف وجهه
-
-
صورة وقت العصر وبهذا الوقت كانت نوني نايمة جو لمنا شروق وريم يسلمون علينا لانهم بيرجعون لـ الرياض وآه يا لحظة الوداع كانت أيام حلوة معاهم سولفنا ضحكنا لعبنا وكل شي سويناه سلمنا عليهم إلا اختي دقت عليهم وودعتهم
إهداء إلى شروق وريم اللي كانت أيامنا معهم أحلى الأيام :
فيني ألم غربة من فرقا أعز الناس
سفينة تايهه تبحث عن موانيها
وذكرتك يوم ووعدتك وضاقت فيني الأنفاس
بكت عيني على فرقاك لكن من يواسيها ..
-
-
لحظة شاعرية للـ الغروب : )
-
-
-
هنا مسكت معنا لما شفنا الخيل إلااااا بنركب عارفة إنه بايخ
بس لما قال بلف فيكم على كل الشاليهات وافقنا : )
-

-
رجعنا ولقينا اهلي مجهزين أغراض الشوي وبدينا نشوي امممم كان طعمه لذيذ وله طعم غير قدام البحر
-
-
وماهي إلا دقايق حتى طب علينا ضبااااااب عجيييييب لـ درجة إن السيارة وهي قدامي ماأشوفها
والشاليهات كلهاااا اختفيت استمر تقريباً دقايق لكنها طويلة وأخفت كل المعاااااالم كان حتى منظره
ممتع
-

-
استغلينا الفرصة وكتبنا أسامينا على السيارة : )
-
” آخـــــــــــــــــــــــــــــــــر يــــــــــــــــــــــــــــــــــــــوم “
-
وكـ العادة سهرنا إلى الصباح بإستثناء شروق وريم فقدناهم الصراحة المهم لقينا هذا الشي
بالبحر مجدوع بس للأسف بعيد خخخخخ قلنا لمحمد يتمصلح مع ولد قاعد يسبح عشان
يجيبه طبعاً الولد ماصدق هههههههه جابه وهو يشاور : هاه كم تعطوني عليه !!!
أخذناه وقعدنا نسبح فيه سبحنا في البحر كل العائلة من أبوي واخواني إلى عمي وعيال عمي وعمتي موكا
وانا ونوني وغيداء تقريباً دخلنا نسبح من 9 إلى 11 صباحاً يعني فليناها من جد المهم اشوف العيال
مشوا من مكان الشاليهات بالبحر إلى الجت سكي وراحوا يلعبون وحنا نشاور بعض خلونا نروح لاااا مانبي
-
-
قعدنا هنا نشوفهم وأغرانا شكل الجت سكي وقطعنا مسااافة طووويلة من الشاليهات مروراً بالأوتيل والمطاعم
إلى الجت سكي وطبعاً عباياتنا عقب البحر لا احد يتكلم عنها كلها موية خخخخ وحنا نمشي عند العالم
وصلنا للجت سكي ودخلنا ودور دور لما جاء دوري واستانسنا الصراحة على قولة ريم اذا ماركبتيه اعرفي
إنك ماجيتي لشاليهات أصلاً ههههههههه وانا أشهد كان ممتع بمعنى الكلمة ! ” ترى اللي بالصورة ولد عمي مو حنا ”
-
-
الجت سكي اللي ركبناه
-

-
لحظة الغروب لـ آخر يوم لنا في الشاليهات أو بالأحرى الشرقية كلها
-

-
وفي الطريق على قولتهم رحنا لـ التحلية أو المكان اللي فيه مطاعم كثير وتعشينا هناك
ومسكنا خط العودة لـ الرياض والعالم نيااااااااما في السيارة على عكس طريق الذهاب لها : (
طبعاً حسبت نتائج نومي من أول يوم مشينا فيه الأثنين إلى الخميس لقيت 4 ساعات بس !
خخخخخ والله إني خبلة وانا اقول ليه تعبت يوم رجعت من هـ المرمطة والتمتير اللي سويته : (
-
خط النهآية :
ع فكرة تراني تعبت في هذا التقرير و في تحميل الصور وتصليحها من الخميس إلى يوم السبت وعلق علي
ألف مرة الفايرفوكس والتحميل الزفت بس صبرت لـ عيون المزعجيني .. حتى موكا جاية عندي كل هـ
الفترة اللي اصلح فيها الصور ولا قدرت اتهنى معها كل شوي ناطة للجهاز أحمل عذبني وربي بس الحمدلله
انتهييييت وابي رآيكم ..!
والكاميرا : كانت بيد موكآ من طريق الشرقية إلى طريق الرجعة لـ الرياض هي مصورتنا (L)
إهداء لـ أرض الشرقية :
أحبك كثر ماعاثت رياح بحسبة البحار
وأحبك كثر ما البحار يعشق نسمة بحورهـ